Ang Kinabuhi Lad-Ang
By fetus. Filed in Bisaya Ispisyal |
Agi’g tubag sa gi bulaan sa akong su-od nga higala nga ginganla’g Mamon, o Raymond ang iyang tinuod nga pangalan sa iyang blogspot nga gi ulohan ug “^*%(( “, gihimo ko kining saysay sa akong mga gipamalandong sa akong kinabuhi ining mga higayona.
Ang panahon nag labay susama sa panganod nga gi anod lang sa hangin sa kahitas-an. Ang mga panganod nagbag-o sa iyang hulagway, ug sa iyang hitsura. Nindot nga pamalandongon nga sa iyang pagbag-o, wala nausab ang iyang pagkapanganod. Susama sa akong kinabuhi, ug sa atong tagsa tagsa ka mga kinabuhi, kita mausab, makahimamat ug nagkadaiyang mga tawo, makasuod ug lain lain nga mga tawo, ug ma higugma sa lain lain nga mga tawo.
Ambot nganong na lad-ang akong kinabuhi, kini tungod ba kaha kay daghan na ko ug naagi-an nga kapakyasan nga ang akong masinati ang kawagtangan sa bili ug kahulugan sa kinabuhi? Nga tungod sa akong pagka garboso nga ang akong panglantaw KAHIBALO NA KO SA TANAN??? Mao gyud na ang akong problema. Pero makaingon gihapon ako nga kahibalo ko sa tanan. Kahibalo ko tungod kay lohikal ko nga pagkatawo.
Kini nabatyagan sa akong pag pamalandong nganong wala nahitukma ang dagan sa akong gugma sa akong mga gusto. Kini tungod kay nagpadala ako sa akong pagkamanhid, tungod kay nahadlok nga masakitan. Ug tungod niana, napakyas ako sa gisugyot ni Floyd kanako nga dapat mahigugma ka sa bug-os, ug sa walay lipod-lipod. Tinuod, di ko kamao unsaon pagbati na sa akong unsay tinuod nga pagbati, ug kini dili nako ikalimod nga makapakyas gyud sa mga butang nga nagkinahanglan sa imong pagbati, ug dili ang imong utok. Matud pa sa akong Mommy Yow, “You’re too cerebral, that’s why,” nga hangtod karon naglanog sa akong utok ug nahipatik sa akong alimpatakan. Naghugyaw ang mga gipangsulti ni Gigi sa akoa samtang iya akong gi usisa mahitungod sa akong problema sa gugma.
Dili lang tungod sa gugma nga nakaingon ko ang akong kinabuhi nahimong lad-ang. Basin mao tingali ni ang bati-on kung ikaw perpekto na. Perpekto ka tungod kay nakahibalo ka nga ikaw tawo, ug ang tawo dili gayud mahimong perpekto. Nahimo kang perpekto tungod kay ikaw nahimong “ganap” na perpekto. Sama kining konseptuha sa:
Pareha na tang tanan. Walay adunahan, walay pobre. Walay niwang, walay tambok. Walay balay, naay balay. Walay bulok, walay utokan. Walay magtutudlo, walay tinudluan. Sa laktod, walay nagkada-iyang mga kina-iya.
Dili ba lad-ang? Dili ba maka-ingon ka nga wala nay pulos? Wala nay kahulugan? Apan, maka-ingon pud ka nga perpekto siya diba, o ming-abot na siya sa iyang kinatas-ang sangputanan? Ug tungod sa iyang pagkaperpekto, lad-ang na siya? Makapangutana pud kita kung mao ba kining konseptoha nga mahitabo sa laing kalibutan, o sa walay liko-liko, ang langit.
Mopadayon ko sa akong saysay mahitungod sa akong pagkamatngon nga ako, hingkod na. Nagtrabaho sa usa sa mga kompanya nga sa akong nahibalo-an balik sa ikatulong ang-ang sa akong pag eskwela sa primadong unibersidad sa Pilipinas, nag pahimulos sa atong yutaw-han. Dili lang sa atong mga edukadong kabatan-onan, kundili usab sa atong palibot ug ang mga ni-a ni-ini. Mi-ingon kanako si Gayle nga nasinati pud niya ang akong nabati bag-ohay lang. Kadto dawng nasinati nako samtang naglingkod kami sa dormitory sa among tulungha-an. Kadto kunong sa kalit lang mingsulti ko nga “dako naman diay ko”, “hingkod naman diay ko”.
Ambot lang. Mao ning dili ko tig butang ug mga sanaysay dire sa akong blogspot tungod kay wala na akoy nakit-an nga kapuslanan pa. Ug maka-ingon ko nga dili pud ni makatabang nako sa pagpagawas sa akong gibati tungod sa akong kina-iya usab.
Thursday, January 19th 2006 at 8:28 am |
waaaaaaaaaaaaaaaaaa sumakit ulo ko. translate! halos kalahati nang mga salita di ko alam!!!!!!!!
dwin, ang lalim mo—pa rin— mag surface ka na’t pangit dyan sa malalim— ayoko na dyan.
Friday, January 20th 2006 at 6:18 pm |
o! tandaan mo! mangibang buhay, o sumakabilang buhay na ako! nyehehehehe